پاکستان کو سعودی عرب سے 3 ارب ڈالر کا رول اوور مل گیا، امریکہ نے 10 ارب ڈالر کی مدد سے انکار کر دیا

پاکستان کے وزیر خزانہ محمد اورنگزیب نے تصدیق کی ہے کہ سعودی عرب نے پاکستان کو تین ارب ڈالر کی مالی سہولت کا رول اوور دے دیا ہے۔ انہوں نے یہ بات بدھ کے روز پارلیمنٹ ہاؤس میں سینیٹ کی قائمہ کمیٹی برائے خزانہ کے اجلاس کے بعد صحافیوں سے گفتگو کرتے ہوئے کہی۔ وزیر خزانہ کا کہنا تھا کہ سعودی عرب کے ساتھ اس معاملے پر بات چیت کے بعد رول اوور کی مدت میں توسیع کر دی گئی ہے، تاہم انہوں نے نئی مدت کی تفصیل بتانے سے گریز کیا۔

یہ مالی سہولت اصل میں رواں سال اپریل میں فراہم کی گئی تھی تاکہ پاکستان متحدہ عرب امارات کو ساڑھے تین ارب ڈالر کی ادائیگی کر سکے۔ اس تین ماہ کی سہولت کی مدت 31 اکتوبر کو ختم ہو گئی تھی، جس کے بعد ریاض نے اس میں توسیع کر دی۔ وزیر خزانہ نے کہا کہ سعودی عرب کے ساتھ پاکستان کے قریبی اور اسٹریٹجک تعلقات کے پیش نظر اس معاملے پر فکر کی کوئی بات نہیں ہے۔

وزیر خزانہ نے یہ بھی بتایا کہ امریکہ نے پاکستان کی دس ارب ڈالر کی لیکویڈیٹی سپورٹ پروگرام کی درخواست پر غور کرنے سے انکار کر دیا ہے۔ انہوں نے واضح کیا کہ پاکستان نے واشنگٹن سے نہ تو کوئی کریڈٹ لائن مانگی تھی اور نہ ہی کوئی ضمانت شدہ سہولت طلب کی تھی، بلکہ درخواست لیکویڈیٹی سپورٹ پروگرام کے تحت دی گئی تھی۔ ان کا کہنا تھا کہ امریکہ کی مدد ملے یا نہ ملے، پاکستان اپنے بیرونی کھاتوں کے حوالے سے آرام دہ پوزیشن میں ہے۔

سیکرٹری خزانہ امداد اللہ بوسال نے کمیٹی کو بتایا کہ پاکستان کو رواں مالی سال میں مجموعی طور پر 21 ارب 50 کروڑ ڈالر کی بیرونی ادائیگیاں کرنی ہیں، جن میں 17 ارب ڈالر اصل رقم اور چار ارب ڈالر سود شامل ہے۔ انہوں نے بتایا کہ سات ارب 30 کروڑ ڈالر دو طرفہ رول اوور کی صورت میں موجود ہیں، جن میں چین کے چار ارب ڈالر کے سیف ڈپازٹ، سعودی عرب کے تین ارب ڈالر اور کویت کے 30 کروڑ ڈالر شامل ہیں۔

ذرائع کے مطابق سعودی عرب نے پاکستان کو مجموعی طور پر آٹھ ارب ڈالر کے ڈپازٹ فراہم کر رکھے ہیں، جن میں سے پانچ ارب ڈالر کی سہولت کی مدت پہلے ہی 2028 تک بڑھا دی گئی تھی۔ باقی تین ارب ڈالر کے لیے مالی سال 2027 کے تحت ممکنہ طور پر ایک سال کا رول اوور دیا گیا ہے۔ چین اور کویت نے بھی بالترتیب چار ارب ڈالر اور 30 کروڑ ڈالر کے رول اوور کی یقین دہانی کرائی ہے۔